[justify]بسم الله الرحمن الرحيم
السلام عليكم ورحمة الله وبركاته
اولا/ احسن الله عزائنا وعزائكم في الفقيده واسأل الله ان يرحمها برحمته هي وكل موتى الخويتم والمسلمين أجمعين. امين.
ثانيا /في الحقيقه لم اجد شيء تجود به اناملي المتواضعه على كيبوردي المتواضع ايضا، خصوصا في ساعة متأخره كهذه من الليل ناهيك عن ان هذه اول مشاركاتي فلا اعرف كيف سيكون ايقاع حرفي على بني جلدتي ولكن كل ماأعرفه انهم (مني وفيني ) فان كان هناك شيء من الخطاء فهم لباس لجنبي وان كان هناك شيء من الصح فمنهم نهلت علمي.
ثالثا/اسأل الله ان يجمع هذا الموقع قلوب تفرقت ومواهب دفنت وشباب فلت وأئمه شردت وشيبان تناشبت وكهيل بالكلام تحاذفت ووووو الى اخر الى اخره الى آخره؛
بالله خلوني اشرح لكم كلامي في النقطه الثالثه بإسهاب وليس بإيجاز
قــــلـــوب تفــــــــرقـــــت= المشهد الاول:
ياخي سبحان الله فيه احيان عندما تتأمل في القريه تجد بعض الناس زعلان عليك بالفطره مع ان حياتك كلها ماغلطت عليه،وتقول في نفسك ياخي يمكن هذا من مبدأ حديث الرسول صلى الله عليه وسلم (يولد المولد على الفطره فأبواه اما يهودانه واما ينصرانه )فيمامعناه. يمكن اول ما ولد على طول اهله بعدما اذنوا في اذنه قالوا له ثاني شيء على طول انتبه من ولد فلان وفلان ترى فيهم وفيهم ؛طيب ياخي خلوه يكتسب خبراته بنفسه لاتدخلونه في مشاكلكم يالكبار.وساعات تقول ياخي يمكن هو كذه معصب شد بلد
اما بسبب جينات اكتسبها من جده السابع عشر غفرالله له
واما بسبب المطبات في القريه وبرضه تقول في نفسك ياخي ولو على الاقل يدفنا بأبتسامه على الطاير ولو من باب الصدقه لحديث الرسول صلى الله عليه وسلم (تبسمك في وجه اخيك صدقه)فيمامعناه.وساعات يمر واحد ممن انعم الله
عليهم و(بالعافيه) يمر من عندك بسرعة الف كيلومتر في الساعة ولايسلم وتقول في نفسك ياخي هذا (وش يحس به اول مايصحى من النوم
) وتقعد تقول في نفسك ياولد يمكن طالع عمره ماأمداه يقول لسواقه اللي اسمه (جوهر) وقف الله يحييك خلنا نشوف وش عند هؤلاء المواطنين مع انك واقف عند باب بيتكم ،ياولد
يمكن انه يعتقد اذا وقف وسلم بنطلبه سلف ،ياولد يمكن انه شبه علينا اننا احد معالم الارض الصامته على مر التاريخ. وبرضه تقول ياعمي عديها لو دامت له كانت دامت لغيره ولكن ماتدوم الا لخالقها سبحانه .والله المستعان.
نرجع للشرح<<<<<<<<<<<<<<
مواهب دفنت=المشهد الثاني:
انا عاد هذه النقطه بالذات تعني لي الكثر ولكن راح اشرحها لكم بالمثال ليتضح المقال:
مره من المرات كنت اتعاطى القهوى انا واحد اصدقائي في كوفي شوب وجاه اتصال من خارج المملكه وكلم الرجال وخلص وقفل وهو مبســــــــــــــــــوط قلت له وش فيك قال يااخي هذا ممن تفخر المملكه بابتعاثهم خارجها والاجمل من كذا انه من ربعنا غامدي قلت له من وين وقام يوصف الرجال الى ان وصل الى الخويتم قلت له بس بس عرفته اذا انت فخور فيه اجل انا وش اقول لانه من بني جلدتي ومن مسقط راسي وحسيت من الفرحه ماجعلني اقول(صديق جيب كرسي ثاني كرسي واحد ما عاد يسعني)
يعني بالله ياأخوان وش يصير لويكرم هالولد الموهوب من قريتنا وش يصير لو استقبله في العوده وفد من قريتنا على كم كامري وكابرس ومافيه مانع كرسيدا بقس ،ياخي انا لست اقول حطوا عليه هاله من الزجاج وعظموه ولكن اقول حسسوه انه سوى شيء في حياته حسسوه ان فيه وراه من يهتم لامره ولكن الله المستعان.
نرجع للشرح<<<<<<<<<<<<<<<
شباب فلت=المشهد الثالث :
اولا خلوني اشرح لاصحاب الرعيل الاول اللي ماهو فاهم كلمة (فله)بلهجة الشباب معناتها (البسطه والمرح كأن يمرعليك صاحبك قائلا هيا بنا نفل=يعني نغير جو ونطلع من الروتين الممل في حدود بعيده عن الشطحه)
وليس معناة فله بلهجة شيبان القريه اي(عندما يجدك احد شيبان القريه في وقت متاخر من الليل قائلا لك من انت ولده هوه ماتروح البيت آرب معك فله=اي مصيبه من العيار الثقيل لاسمح الله).المهم انا اقصد ان شباب القريه والله ياناس مساكين ومحترمين وخلوقين جدا جدا لكن مالقوا مكان يظمهم ولااحد يسمعهم حتى في اجتماع العيد والله كان قلبي يتقطع على واحد منهم وهو مسكين يطالب بملعب كوره
كوره ياناس وهو كلامه صح وتفكيره صح لان الملعب واللعب هو المدخل الوحيد لقلوب الشباب شئنا ام ابينا ،يـــــــــــااخـــــــوان بالله وش يصير لوحطينا لهم ديوانيه فيها تتوحد ارآئهم وتقوى افكارهم بأنتقادات بعضهم البعض ، وش يصير لوأعطيناهم ارض(حيله)فاضيه يلعبون فيها ولا يخاف اللي بيتبرع بارض للعب فقط فقط،لاننا راح نوقعهم على اوراق اللي نشوفه وهوخارج من الملعب يغرف من تراب الارض شي في جيوبه يحرم من الجنسيه الخويتميه ، ياناس والله عيب والله عيب ذابت هوية ابنائنا في القرى الاخرى لانهم محضرين 24ساعة في ملاعبهم وديوانياتهم حتى صار الواحد يقول انا من الخويتم وهو يعتليه الاستغراب لانه ماعرف طعم الانتماء .والشيء الثاني اللي اتحدى اذا ماجال في خاطر اي احد منكم في هذا العيد 1429عيد الفطر بعد صلاة المشهد كان فيه شباب ودك تعرف كيف يطلع هذا في الحلقه الاخيره من الخويتم ليش مايكون فيه تواصل وتعارف بيننا وبينهم ،تخيلوا مسكني واحد منهم وسلم عليه والله ماعرفته وقلت يااخي انا مدين لك بإعتذار قال ليش عسى ماشر قلت لاو الله بس اني ماعرفتك وانا احييك انك عرفت عن نفسك وبدأتني بالسلام. الله المستعان.
نرجع للشرح<<<<<<<<<<<<<<<<<<
أئمه شردت=المشهد الرابع :
عاد هذا الموضوع ماودي اعلق عليه كثير عشان ماندخل في حساسيات ولكن بلغني يااخوان انه فيه في قريتنا ناس مشايخ وانا اعني كلمة (شيخ) لديهم من العلم والتفقه في الدين ما الله به عليم يااخي حطوا لنا واحد منهم ممن تتفق عليهم القلوب لان الجمعه لها من اسمها نصيب ففيها يجتمع الناس كلهم عشان يسمعون شخص واحد ،شخص فيه من الصوت الجهوري مايشدك له؛ شخص يتفقد الحال قبل السؤال؛ شخص بعيد عن التكرار والقتل غير المباشر =(اعني البطء الشديد في الالقاء
)؛شخص يناقش في جُمَعِه ولوبخطبه في الشهر مواضيع القريه ليش لأ، شخص بعد الصلاه يقول ياناس ترى فلان مريض خلونا نزوره فلان صار عليه حادث قطوله (قطه=فرقه بلهجة الديره) شخص يذكر العالم بان اليوم حياة وبكره موت لا احد يقعد يطارد خلف الاراضي والصكوك،بإختصار شـــــــــــــــخــــــــــــص يجمع القريه يوم الجمعه في مسجد واحد بدل اللي حاصل كل عائله ترسل له ممثل وسفير يمثل عائلتهم في المسجد والباقين في مساجد اخرى لسان حالهم يقول (رح ياولدي عشان لومااحد صلى في المسجد الجمعه تفوتك انت الصلاه ولا تفوتنا كلنا)والله المستعان.
نرجع للشرح<<<<<<<<<<<<<<<<<<<<
وشيبان تناشبت=المشهد الخامس :
سبحان الله هؤلاء آبائنا وأجداننا واعمامننا واخوالنا ولا نقدر نقول فيهم شيء غير الله يحسن خاتمتنا وخاتمتهم_ولكن ياخي ودك انهم يجتمعون على رأي واحد وكلمه وحده_مثال :ياخي اذا جاء العزا راح كل اثنين لحالهم كأننا في عرضه (اثنين اثنين).
مثال ثاني: واذا حضرنا زواج القرى الثانيه تعرف من بعيد منهو عريفتهم واحنا(لسان حالنا يقول)_نحن لانعاض الكشخه والمحافظه على الهندام والمظهر الحسن ولكن لايقعد كل واحد يلعب دور العريفه ماعاد نعرف وين النسخه الاصليه
_الله يهديهم_ومشاكلهم ماعاد زيما يحكٌوننا ابواننا واجدادنا رحمة الله عليهم انها كانت تحل داخل القريه والمخطيء يقال له مخطيء وارجع وراك ويعاقب بالقطيعه اوغير ذلك والمظلوم ينصر ويؤازر وتقال كلمة الحق له لوكلف الامر ان تقولها على اخيك والحين الله يهديهم مايوقف الواحد منهم الين يقول سلام ياباب المحكمه طيب ليش اهداؤا اول واجلسوا وتفاهموا لانكم انتم قدوتنا و احنا نستقي منكم بالمحبه او الاكراه قاعدين نشوف
ونسمع ولــــــــــــــكــــــــن.الله المستعان .
نرجع للشرح<<<<<<<<<<<<<<<<<<
وكهيل بالكلام تحاذفت= المشهد السادس:
هي عبارة وضعت لاتمام السجع فقط.
والـــــــــــــــــــلـــــــــــــــــــه المـــــســــــــتـعـــــان على ماتـــصـــــــفـــــون.
اخي اختي يامن قرأتي مقالتي يامن زعلت من مقالتي يامن ضحكت من مقالتي لم اكتبها والله من فضاوه ولا لقسوه ولا لأجرح احد،
ولكن كل مافي الامر اني اغار عليكم واعلق عليكم امال كبيره بأن نترك الماضي بممثليه ومسرحيته الضلماء ونفتح الستار على اوراق بيضاء كالثلج صافيه كالماء العذب ملؤها آراءو انتقادات بارده تروي المتلقي وتصححه بلطف لكي لا تكسره .
حروف من الًََماس والقلم علاس
تحياتي.
الرئيسية 
التسجيل 
دخول 
الأحد نوفمبر 23, 2008 4:44 am
